Pesa za usajili wa Neymar kuzibomoa Chelsea,Liverpool na Tottenham

 

Neymar Dos Santos anaonekana anaondoka Barcelona, siku za karibuni kumekuwa na mambo mengi yanayomhusu nyota huyo yanayoashiria mwisho wake wa kukipiga Nou Camp umefika.

Ugomvi wake wa jana na mlinzi Nelson Semedo umezifanya tetesi za yeye kuondoka Barcelona kuzidi kukua huku Barcelona wenyewe nao wanaonekana wako tayari kumuachia mshambuliaji huyo aondoke.

Kama Neymar atakwenda PSG itaigharimu kiasi cha £200m au zaidi, pesa ambazo Barca watazipokea kutoka kwa PSG zinaweza kuwafanya wapate kwa haraka mbadala wa Neymar.

Tayari Barca wameshaanza kutafuta mtu atakayeziba nafasi ya Neymar na kati ya vigezo wamekuwa wakiangalia sio tu ubora wa mchezaji husika lakini pia umri wa wachezaji wanaowataka.

Phellipe Coutinho ndilo jina ambalo kwa sasa lipo katika makaratasi  ya kamati ya usajili wa Barcelona, Coutinho anaonekana kuhitajika zaidi katika klabu ya Barcelona kuliko mchezaji mwingine yoyote.

Coutinho sii tu kwamba anaweza kuchukua nafasi ya Neymar lakini kwa muda mrefu Barcelona wanamfuatilia Neymar wakiamini anaweza kuchukua pia nafasi ya Andre Iniesta ambaye umri umeanza kumpa mkono.

Barcelona wameshajaribu kutuma ofa ya kwanza ya £70m kwa Liverpool lakini Liverpool wameikataa ofa hiyo na kusisitiza Coutinho hauzwi lakini dau kubwa zaidi kutoka kwa Barcelona linaweza kuishawishi Liverpool kumuuza Coutinho.
Chelsea nao hawako salama na pesa za Neymar, wiki hii kumeibuka taarifa ya kwamba Barcelona wanajaribu kumshawishi Eden Hazard kuachana na mpango wa kwenda Liverpool na ajiunge nao.

Real Madrid walijaribu kumnunua Hazard kwa dau la £70m lakini ikashindikana na sasa Barcelona wanajaribu kutuma ofa zaidi ya £70m kwa Chelsea, Antonio Conte amekiri kusikia habari za Barcelona lakini amesisitiza Hazard haendi popote.

Tottenham wanafurahia sana kwa sasa huduma ya Delle Ali kiungo ambaye amekuwa gumzo sana duniani kiasi cha kuzivutia klabu kubwa nyingi duniani ikiwemo Real Madrid,Chelsea na Manchester United.

Barca nao wameingia kwenye mpambano wa Ali na inasemekana kwamba wako tayari kutoa £75m kumnunua, usajili ambao Tottenham hawako tayari hata kuuzungumzia kwani hawataki hata kidogo kusikia habari za Ali kuondoka.

Kwa ujumla ni kwamba bado PSG hawajatuma ofa hiyo ya £200m kwa Barcelona lakini kuna uwezekano mkubwa wa jambo hilo kutokea na likitokea ni wazi kwamba Barca wataitumia pesa hiyo kununua wachezaji wakubwa mmoja au zaidi.